SAJAK SUNDA

Kinanti Nastiti

Kinanti
Jalma hanteu boga guru,
Teu meunang pituduh leuwih,
Ningali kamana-mana,
Sasar di jalanna pasti,
Lir hayam leungiteun biang,
Hanteu aya nu disungsi (wawacan Ratu Déwi Maléka)

Basa jalan jajahan pinuh ku eurih
Kuring teu boga pakarang keur ngalénglang
Ngan kahayang nu makalangan
Ngan karingrang nu ngarangrangan

Aya pangjurung ti indung nu matak adigung
Aya panitah ti bapa nu matak ngarasa
Ngabadéga salila katiga warsa
Mundut élmu pangaweruh
Nyandak warah jeung winarah

Mugia putra mendak pamuntang
Dina jalan anu loba lungkawing
Mugi Nu murba alam ngamaslahatan
Ka anjeun nu gédé jasa

Kamasan, 3 Juli 2007

Nyaksi Ka Beurang Nyaksi Ka Peuting

Sampurasun ambu,

Sampurasun ambu sareng apa.

Ti putra seja ngahaturkeun pangnuhun

Kana atikannana

Kana didikannana

Putra baris nyaksi ka beurang

Putri baris nyaksi ka peuting

Najan lénglah teu mapah

Najan peta teu nata

Mugi cipta ngajadi

Kamasan, 7 Juli 2007